Os bos resultados de Rock Band válelle aos seus creadores uns ingresos adicionais de 300 millóns de dólares

Os fundadores de Harmonix, Alex Rigopulos e Eran Egozy, recibiron no último trimestre un incentivo de 150 millóns de dólares superando as expectativas que Viacom tiña postas na compañía ao adquirila en setembro de 2006 (por 175 millóns de dólares), e que en 2009 se completará con outro tanto, de xeito que o bo funcionamento de Rock Band (que xa vendeu 7 millóns de copias en 13 países, así como 26 millóns de descargas musicais) estaría a xerar uns ingresos adicionais de 300 millóns de dólares para os seus responsables.
O incentivo estaba fixado nun 3% dos marxes operativos xerados polo xogo Rock Band, pero Kelly McAndrew, voceira de Viacom, recoñeceu que non anticiparan que a cantidade a pagar fose tan elevada, engadindo que «se fan máis cartos para nós e temos que dar un pouco a cambio, está ben».
Lembremos que o xogo desenvolvido por Harmonix se vende por entre 39,95 e 69,95 euros (segundo a plataforma) , o paquete completo de instrumentos (guitarra, batería e micrófono) chega aos 139,95 euros e as cancións como descarga a prezos de entre 0,96 e 2,88 euros o tema (cun prezo medio de 1,92 euros), polo que está claro que este tipo de xogos son unha máquina de facer cartos.
A España chegará este mes Rock Band 2 (xogo que xa ocupa o 5º posto de vendas para Xbox 360 nos EE.UU.) en tamén se agarda o lanzamento dunha edición do xogo con temas de AC/DC, aínda que polo momento a súa comercialización non chegou a Europa.