Fito y Fitipaldis estrean canción para Guitar Hero World Tour

A primeiros de mes a canción Hay poco Rock and Roll de Platero y Tú se incorporaba á tenda de descargas de Rock Band, e hoxe mesmo é o xogo Guitar Hero World Tour o que engade ao seu catálogo un tema de Fito y Fitipaldis (actual formación de Fito Cabrales), que se pode mercar por 1,99 euros para PlayStation 3 ou por 160 puntos (1,92 euros) para Xbox 360.
Por la boca vive el pez convértese así nun dos títulos españois dispoñibles para un xogo de Guitar Hero xunto con Escuela de Calor (Radio Futura), So Payaso (Extremoduro), Avalancha (Héroes del Silencio) e Estrella Polar (Pereza), aínda que a súa estrea se demorou xa en dúas ocasións, pois se anunciara tanto para o día 11, e posteriormente para o 24 do presente mes, chegando hoxe mesmo acompañado por Degenerated da banda sueca Backyard Babies e Johnny dos holandeses Di-Rect, mellorando a oferta de grupos europeos en Guitar Hero World Tour.