Os códigos PEGI incorporan cores

Cada vez que saltaba aos medios de comunicación un suposto escándalo polo lanzamento dun videoxogo con contidos adultos (principalmente pola súa violencia) algunhas asociacións de pais e consumidores desinformadas esixían unha regulación para cualificar por idades aos videoxogos, esquecendo que o sector leva anos auto-regulado, para o que adoptaron un sistema coñecido coma PEGI que distingue por idades o contido dos xogo (non o seu nivel de dificultade, coma acontece nos xogos de mesa) e incluso detalla mediante símbolos claramente identificables se nun título aparece violencia extrema, sexo, linguaxe ofensiva, xogos de azar, uso de drogas, discriminación ou, simplemente, elementos que poden meter medo a un cativo.
Para mellorar a visibilidade e a comprensión por parte dos pais deste códigos, veñen de modificar o seu sistema de cualificación por idades, que aparte dos números que representan a idade mínima para un xogo, empregan as cores verde, amarelo e vermello para reforzar o significado deste código. Así, as cualificacións de 3+ e 7+ terán fondo verde, as 12+ e 16+ terán un fondo amarelo, e a cualificación 18+ contará cun fondo vermello bastante rechamante, polo que queda moi claro que os xogos que o presentan na súa caixa non están recomendados para menores de idade.