6 de cada 10 consolas vendidas en España son de Nintendo

Que Nintendo é o líder no sector dos videoxogos tanto en consolas portátiles coma domésticas é algo que ninguén dubida, pero agora GFK puxo os datos do sector España en negro sobre branco, deixando claro que en volume de unidades vendidas, a Nintendo DS e a Wii coparon o 61,3% do mercado, de xeito que nos fogares españois habería xa 2 millóns da consola doméstica de Nintendo e 4,8 da portátil. Dende a compañía nipona están moi satisfeitos con estes resultados, e nin sequera camuflan o feito de que nos dous anos anteriores tivesen unha cota maior.
Analizando a situación de xeito pormenorizado temos unha penetración da Wii do 50,9% no mercado doméstico, seguida polo 31,9% da PS3 e o 17,2% da Xbox 360 (demostrando que España é un caso especial en Europa, pois Sony supera á consola de Microsoft, o que practicamente só se remite no Xapón), mentres que no mercado das portátiles, o predominio de Nintendo é impresionante co 67,6%, mentres que a PSP de Sony ten que conformarse co 32,4% (aínda que é todo un éxito de Sony, que gañou tal posto a pulso, xa que anteriormente o dominio de Nintendo no sector era absoluto).