Loroestudio leva aos móbiles o servizo de procura de emprego do Concello de Santiago

A empresa galega Loroestudio, especializada en deseño de servizos de promoción no móbil, está a colaborar co Concello de Santiago no desenvolvemento dunha campaña dirixida a facilitar a busca de traballo entre os demandantes composteláns. A achega de Loroestudio baséase, precisamente, en tirar o máximo partido da súa experiencia en estratexias de marketing para dispositivos, como por exemplo a posta en marcha para promover nos móbiles as rutas do viño máis importantes de España, un servizo que adaptaba ao eido da enoloxía a plataforma MobiGuías da propia Loroestudio.
Pois ben, o traballo despregado co Concello de Santiago consiste en algo semellante, pero no terreo laboral, achegando ofertas de traballo e información sobre cursos e bolsas aos móbiles dos usuarios do servizo. Isto complementa ao subministro de información laboral que a Concellería de Traballo de Compostela adoita a enviar en formato pdf e papel durante os meses de verán.
Segundo informa Lolo Rey, socio-director de Loroestudio, a posta en marcha desta nova vía a través do móbil está a ter “unha gran aceptación grazas á comodidade de recibir cada semana no teléfono as ofertas de traballo de xeito automático, e todo isto mediante unha aplicación interactiva que fica instalada nos terminais”. Na súa opinión trátase dunha achega de gran interese para a cidadanía, non só polo dito senón tamén porque promove un uso social e práctico das novas tecnoloxías, apoiando o seu afianzamento real na sociedade galega.
Para máis información sobre esta iniciativa cómpre visitar os portais de emprego do Concello de Santiago, tanto Feira do Emprego como Compostela Traballa, onde se fornece aos posibles usuarios dunha revista en pdf coas indicacións para descargar a MobiGuía adaptada a esta finalidade.