A Estrada Dixital amplía a súa oferta de rede a 3 megas de capacidade

A Estrada Dixital, servizo pioneiro en achegar acceso sen fíos para o noso rural, vén de introducir melloras nas súas achegas de internet. Segundo apuntou os días pasados a Fundación Cultural, entidade que xestiona dende o concello pontevedrés a dita iniciativa tecnolóxica, os usuarios da conexión que esta oferta poderán beneficiarse a partir do 1 de agosto dunha nova conexión con 3 megas de descarga de datos e 1,5 de subida. O servizo, que a día de hoxe permite a vida dixital de 2.300 usuarios a un prezo reducido, manterá o seu paquete básico de 1 mega de subida e baixada por 10 euros ao mes. Con todo, para quen queira subir aos 3 megas acabados de ofertar, cómpre sinalarlle que xa ten aberto o prazo para contratalo, sendo o único requirimento esixido presentarse nas oficinas que A Estrada Dixital ten no Edificio de Usos Múltiples do Concello.
O prezo deste novo servizo é de 18,90 euros ao mes, máis IVE.
As persoas que non requiran o medre na lonxitude de banda para acceder á Rede proseguirán mantendo o seu servizo básico de un mega e ao mesmo prezo previamente estipulado.
Segundo informou estes días o Concello (promotor deste servizo) e reflicten medios como El Faro de Vigo, os incrementos nas velocidades de acceso de A Estrada Dixital responden a unha demanda da cidadanía. Ao seu xuízo, as melloras permitirán unha conexión máis competitiva.
Por certo que as optimizacións da infraestrutura conseguíronse grazas a un acordo co operador galego R (que posibilitou aumentar a capacidade do fluxo de liña) e grazas tamén a unha liberación xeneralizada do espectro de radiofrecuencia e da lonxitude de banda que se viñan empregando a nivel interno, liberación que deixou marxe para que este espectro e lonxitude se puxeran a disposición dos usuarios.