Adicións Dixitais recomenda tirar proveito do comezo do curso para tomar medidas de control TIC no fogar

Adicións Dixitais vén de facer un novo informe-reconto dos diferentes métodos para evitar que os nosos fillos pasen máis tempo perante o computador e as consolas do que é saudable. O estudo parte da base dos seguintes dous feitos: o comezo do curso escolar (intre máis que axeitado para propor en familia normas para evitar os suspensos, en ocasións motivados polo excesivo uso das novas ferramentas do lecer e da información rexistrado nos meses previos) e a realidade das redes e a banda larga no eido do fogar, que achega unha taxa galega de penetración do 39%, sendo a media estatal do 54%. A xuízo da dita plataforma, non hai dúbida das vantaxes deste proceso de universalización da tecnoloxía, “pero cómpre racionalizalo”.
Segundo explica Juan Romero, fundador de Adicións Dixitais, “o problema que agora se nos propón é lograr que os nosos fillos volvan aos hábitos de traballo e de estudo, algo que deixaron de lado no verán, en moitas ocasións por mor de terlle dedicado tempo de máis á Wii ou á Play ou a calquera trebello electrónico que se nos ocorra, polo que agora é o intre de volver á crúa realidade”. Estes datos, sinala, unidos ao elevado emprego que se dá destas ferramentas entre os menores (o 89,5% dos mozos e cativos galegos fixo uso do ordenador nos últimos tres meses), obríganos a solucionar unha serie de problemas, sinala a plataforma. Por exemplo, poñendo en práctica medidas como as que seguen, axeitadas para comezar:
· Evitar sempre que o computador fique no dormitorio dun adolescente. O ideal é que estea na sala de estar ou nunha zona común da casa.
· Facer un seguimento preciso das actividades que realizan perante a computadora.
Estes dous pasos, con todo, non son a solución definitiva, indica Adicións Dixitais, xa que hai máis aparellos electrónicos nos fogares que o ordenador, por exemplo o portátil ou o teléfono móbil, as axendas electrónicas ou as videoconsolas, todos eles aparellos con potencialidade para acceder á Rede.