A receita electrónica chegará a preto do cen por cento da poboación galega en 2011

Na actualidade, ata 440 centros de saúde da nosa Comunidade, que cobren ao 98 por cento da poboación galega, dispoñen xa de acceso á historia clínica electrónica e 380 están integrados no proxecto de receita electrónica, con 1.358 oficinas de farmacias conectadas.
Todo elo, segundo informan dende a Consellaría de Sanidade, supón “que o 87 por cento da poboación (un total de 2,4 millóns de cidadáns) benefíciase da receita electrónica”
Porén os deberes aínda non están todos feitos e ese 87 por cento de cidadáns e cidadás que se benefician actualmente das vantaxes da e-receita, debe converterse nun 98 por cento a comezos do ano 2011.
Así o vén de explicar a secretaria xeral da Consellería de Sanidade, Sagrario Pérez Castellanos, quen engadiu que ao longo dos próximos meses “farase a incorporación progresiva do resto de centros nos que non hai imposibilidades técnicas, despois de realizar a formación dos profesionais no novo sistema”.
Botando unha ollada aos datos de abril de 2009 (cando tan só 26 centros de saúde e o 7 por cento das farmacias estaban incluídos no proxecto de receita electrónica), é evidente que tanto a Consellería de Sanidade como o Servizo Galego de Saúde teñen realizado un gran esforzo por asegurar a incorporación das tecnoloxías da información e a comunicación na rede de centros de saúde galegos e a día de hoxe pódese dicir que a cobertura das TIC na nosa sanidade é óptima.
Galicia conta na actualidade con oito centros de procesamento de datos: un central e sete nos centros hospitalarios das áreas sanitarias que actúan de nodos para o servizo dos centros da súa área de influencia. Os oito centros constitúen unha rede troncal de alta dispoñibilidade e capacidade replicada con dúas tecnoloxías distintas; e os centros de saúde conéctanse, á súa vez, a esa rede troncal tamén a través de dúas tecnoloxías distintas (ambas activas) para asegurar a máxima dispoñibilidade nas comunicacións.
Segundo a cobertura proporcionada polo operador, explicou a secretaria xeral, a provisión de servizos pode facerse por fibra óptica, punto a punto ou por ADSL. Ademais, algúns dos centros comunícanse por radioenlaces. “Isto significa ter a 594 centros sanitarios de todo tipo conectados, e a inmensa maioría dos centros de saúde con acceso a historia clínica electrónica”, observou.
Na actualidade, engadiu, “o despregue de fibra óptica chega a todas as cidades e, polo tanto, a todos os centros hospitalarios e tamén a 57 centros de saúde. A inmensa maioría dos centros de saúde do Sergas dispoñen dun ancho de banda suficiente para soportar a historia clínica electrónica, se ben hai seis con problemas de ancho de banda para receita electrónica e 25 sen posibilidade de receita electrónica, situados en zonas rurais; situación que afecta tamén a 57 oficinas de farmacia”.
Neste senso, Sagrario Pérez sinalou que “a resposta deste Goberno é clara neste aspecto, habilitando un plan de banda larga, cunha forte inversión prevista de 102 millóns, na que a sanidade goza da maior das prioridades”.