As Xornadas JAI contarán co apoio directo dunha ducia de multinacionais punteiras da innovación

As Xornadas JAI, que se celebran no auditorio do Centro Social Caixanova de Vigo do 15 ao 19 de novembro, contarán co apoio e colaboración dalgúns dos principais técnicos en solucións de automatización industrial de dentro e fóra das nosas fronteiras. Falamos de profesionais que desenvolven o seu labor para as empresas de meirande prestixio no sector, polo que as JAI serán a todas luces unha boa oportunidade para tomarlle o pulso ao panorama das máis modernas tecnoloxías, solucións e tendencias postas ao servizo de algo tan simple (e tan complexo) como a mellora dunha empresa. Entre estes apoios de vangarda tecnolóxica aos encontros galegos atopamos os das seguintes compañías do ámbito internacional, todas elas punteiras do seu eido de actividade.
· 3S Smart Software Solutions. Fundada en 1994 por Dieter Hess e Manfred Werner, está especializada no desenvolvemento de programas para o control industrial.
· Beckhoff. Achega sistemas abertos para a automatización, baseados na tecnoloxía de control por PC. Abrangue o seu eido de acción PCs industriais, software de control ou tecnoloxía de movemento. Entre os seus achados inclúese a posta en marcha de edificios intelixentes automatizados.
· Fanuc Robotics. Fabricante de robótica con base en Xapón, ten presenza internacional e cobertura e tódolos sectores, cunha gama de máis de 70 robots.
· Harting Iberia. Pertence ao Grupo de Tecnoloxía Harting, e está a cabeza en España e Portugal no eido da tecnoloxía de interconexión para control de dispositivos en plantas industriais. Abrangue sectores como a automatización industrial, maquinaria, transporte vertical e horizontal, fontes de alimentación e infraestruturas de telecomunicacións.
· Imatia. Unha das achegas galegas. Trátase dunha firma xurdida ao abeiro da actividade desenvolvida por un grupo de I+D da Universidade de Vigo. Imatia deseña e distribúe unha tecnoloxía chamada Ontimize, que fai máis doado o desenvolvemento rápido de software empresarial e industrial. En base a esta tecnoloxía, Imatia creou un sistema de xestión integral de empresas (ERP) e tamén ofrece solucións a medida (a través de Imatia Solutions). Tamén ten establecidas importantes alianzas con firmas punteiras da programación, consultoría e integración, a través das que leva a cabo transferencias de tecnoloxía. Máis información en www.imatia.es.
· Kuka Robotics. Esta compañía pertence ao Grupo Kuka, unha corporación centrada en boa medida na industria de bens de consumo e no mercado do automóbil. O abano de servizos é amplo, e ai dende tarefas de enxeñaría para o produto final e a produción de sistemas para a súa realización ata a formación dos traballadores e mantemento das súas liñas de produción.
· Phoenix Contact. Trátase dun dos provedores líderes en compoñentes eléctricos e electrónicos para a técnica da conexión e a automatización. Os seus produtos empréganse en tódolos eidos da industria, como por exemplo o sector do automóbil, a construción de máquinas, a alimentación, a enerxía ou o medio ambiente.
· Rexrooth. Empresa pertencente ao Grupo Bosch, trátase dunha subministradora global de produtos para a construción de maquinaria e instalacións, ofrecendo solucións en tódalas tecnoloxías relevantes para o control e posta en marcha: hidráulica, electrónica, movemento lineal e pneumática.
· Rockwell Automation. Inserida por dereito no eido da automatización industrial, Rockwell é probablemente o provedor máis valorado en servizos de control, potencia e información. Os seus obxectivos, dende o punto de vista financeiro e estratéxico, pasan por axudar aos fabricantes a reducir custes, conservar recursos, mellorar produtividade e reducir o tempo de lanzamento ao mercado dos seus produtos.
· Schneider Electric. Esta compañía é a primeira especialista mundial en power & control, ligando dúas actividades que complementan: a distribución eléctrica en media e baixa tensión (distribución para edificios residencias terciarios e industriais) e o control industrial e os automatismos. Traballa en catro grandes mercados: infraestruturas e enerxía, industrial, residencial e edificio.
· Siemens. Firma con máis de 110 anos de experiencia industrial en España, é un exemplo de esforzo a prol da innovación e da divulgación das súas vantaxes. É hoxe por hoxe un dos meirandes grupos industriais do mundo, abranguendo actividades como por exemplo a información e as comunicacións, compoñentes e sistemas para o automóbil, electromedicina, automatización industrial e loxística, sistemas de xestión de seguridade electrónica, etc.
· Wonderware. Trátase dunha empresa pertencente ao Grupo Invensys e é un exemplo moi salientable de factoría de deseño e distribución de software industrial. Subministra sistemas de xestión corporativos en tempo real e basea os seus produtos en arquitectura .Net de Microsoft, que lle valeu entre outras cousas para desenvolver a plataforma ArchestrA para contornos en tempo real.