O libro dixital e as súas implicacións nas universidades, a debate estes días na UDC

A Facultade de Ciencias da Educación da Universidade da Coruña dá acubillo hoxe e mañá a uns encontros encamiñados a xerar debate acerca do libro que nos espera: a obra en formato electrónico convivindo, case con toda probabilidade, co formato tradicional (dun xeito semellante ao CD e ao vinilo no eido da música). As xornadas, que organiza a Biblioteca da UDC, desenvólvense baixo o epígrafe O libro electrónico: presente e futuro na biblioteca e na ensinanza. Os encontros están coordinados por Alba Digón, María Gutiérrez, Inma Doval e María Jesús García.
O obxectivo do evento é, como dixemos, mover á reflexión sobre o libro dixital e o seu afianzamento no eido das universidades galegas, achegándolle á comunidade docente coñecemento útil sobre as implicacións da devandita tecnoloxía.
A xornada de hoxe será inaugurada polo decano da Facultade de Ciencias da Educación, Narciso de Gabriel Fernández, que estará acompañado pola vicerreitora Concepción Herrero e pola directora da biblioteca de Ciencias de Educación da Universidade da Coruña, Maía Gutiérrez.
Logo, desenvolveranse tres relatorios. Entre os participantes nos mesmos cómpre salientar a Manuel Bragado, director de Xerais, na que tratará a partir das 12.00 horas a propiedade intelectual en relación co libro electrónico. Pola tarde, a sesión xirará arredor da súa introdución nas bibliotecas. Entre as charlas destaca a de José Antonio Magán, director da biblioteca da Complutense.