Dous novos polígonos industriais disporán de rede WiMAX dende mañá

Mañá martes, día 30 de novembro, vai ser unha data sinalada no calendario dos polígonos industriais de Castiñeiras no Concello de Bueu e de Monte Afieiras no Concello de Moraña, xa que dende entón disporán de Rede WiMAX para acceder a Internet dende as empresas situadas neles.
Os concellos incorpóranse ao proxecto WiMAX en polígonos industriais e parques empresariais que está a desenvolver a Secretaría Xeral de Modernización e Innovación Tecnolóxica para paliar, segundo aifrman, “as carencias no acceso a Internet de banda larga que hai nestes puntos”.
Dende a entidade pública afirman que, “as deficiencias no acceso a unha Rede de calidade nestas zonas provocan unha diminución considerable na capacidade das empresas alí radicadas para competir no mercado actual”; xa que logo, a chegada desta nova tecnoloxía aos devanditos núcleos solucionará os problemas de comunicación que xa arranxaron tamén outros 29 parques da Comunidade que xa teñen operativa a citada Rede.
O obxectivo deste proxecto é solucionar o acceso a Internet das diferentes empresas situadas nestes emprazamentos mediante a implantación da WiMAX, unha rede que premitirá a transmisión de datos empregando ondas radioeléctricas.
A construción das redes nos polígonos baséase en estándares e tecnoloxías que permiten alcanzar altas capacidades e garanten unha elevada dispoñibilidade do servizo. Para iso, instálase unha estación base en cada polígono e as empresas e residentes na zonas de cobertura poderán contratar o acceso a internet de banda larga, desde 2Mbps ata 12Mbps, con prezos que parten dos 30 euros mensuais. Igualmente, a estación permite ofertar tamén servizos de voz mediante a tecnoloxía VoIP así como contratar servizos de valor engadido como videovixilancia ou intranet corporativa.
Nestes momentos, e á marxe dos trinta polígonos que xa contan con esta rede, outros catro parques empresariais e polígonos industriais incorporaranse ao proxecto durante os próximos meses.