Os consumidores serán os máis beneficiados pola nova normativa das telecomunicacións

O ministro de Industria, Turismo e Comercio, Miguel Sebastián, vén de presentar, perante o Consello de Ministros, o anteproxecto de Lei que modifica a actual Lei Xeral de Telecomunicacións, a norma principal que regula de forma uniforme o sector das redes e servizos de comunicacións electrónicas.
As modificacións incorporadas proporcionan, segundo informan dende o propio organismo, “maior seguridade xurídica e flexibilidade aos operadores, ao tempo que melloran a protección dos dereitos dos usuarios e reforzan as competencias da Comisión do Mercado das Telecomunicacións (CMT)”.
Xa que logo, este anteproxecto reforza os dereiros dos usuarios e a súa protección, e neste senso, establece que os usuarios finais terán dereito a recibir maior información sobre as características e condicións de provisión dos servizos e sobre a calidade coa que se prestan (prezos, limitacións das ofertas…).
Tamén se protexen de maneira máis eficaz os datos de carácter persoal e establécese a norma de dar máis información aos usuarios sobre os arquivos ou programas informáticos (cookies) que se almacenan nos ordenadores e demais dispositivos empregados para acceder á Rede co propósito de facilitar a navegación.
A nova normativa establece, asemade, que o cambio de operador mantendo o número (portabilidade) deberá realizarse no prazo dun día laborable, e mellora o acceso aos servizos para persoas con discapacidade e con necesidades sociais especiais.
Este acceso deberá ser en condicións equivalentes ao resto dos usuarios.
O anteproyecto tamén modifica as competencias e o funcionamento dos organismos reguladores como a CMT e inclúe á Axencia de Protección de Datos como entidade reguladora en materia de garantía dos dereitos de protección de datos de carácter persoal.