O presidente da Xunta participa no encontro estatal TIC que celebra este xoves Ineo

O presidente da Xunta, Alberto Núñez Feijoo, participará no encontro profesional TIC que celebra a asociación Ineo no Hotel Pazo Loss Escudos de Vigo. A entidade organizadora da xuntanza, chamada Encontro Empresarial do Sector TIC, pretende con este evento reunir a algúns dos integrantes máis representativos do panorama galego e estatal da Sociedade do Coñecemento, co fin de intercambiar experiencias a asentar os alicerces de futuras colaboracións O encontro contará tamén coa presenza de Mar Pereira, secretaria xeral de Modernización, e Jorge Cebreiros, presidente de Ineo.
Máis polo miúdo, o evento reunirá (segundo informa a entidade organizadora, por vez primeira na nosa terra) aos representantes das catorce asociacións que constitúen a Confederación Española de Empresas de Tecnoloxías da Información (CONETIC) e máis a diversos membros do tecido produtivo innovador galego. Tras o encontro en si mesmo, que dará comezo arredor das 17.00 horas, Ineo presentará o seu novo Plan Estratéxico 2011-2014 perante o seu Consello Consultivo, integrado polo Consorcio Zona Franca de Vigo, a Confederación de Empresarios de Galicia, Banco Sabadell Atlántico, Novacaixagalicia, a Asociación de Enxeñeiros de Telecomunicación de Galicia e as Universidades de Vigo, A Coruña e Santiago de Compostela.