Boiro, recoñecida polo Goberno como Cidade da Ciencia e a Innovación

O concello galego de Boiro, situado en plena comarca coruñesa de Barbanza, vén de ser recoñecido polo Ministerio de Ciencia co título de Cidade da Ciencia e a Innovación. A distinción, que Boiro compartirá con outros 29 concellos do Estado, vai dirixida a pór de relevo o traballo despregado polo Goberno local a prol da busca de novos modelos de xestión de recursos (meirande substentabilidade), modelos produtivos alternativos e espírito de innovación tecnolóxica e científica. O concello galego, en virtude do premio, converterase en integrante da Rede Impulso durante tres anos, unha iniciativa que entre outras cousas achega apoios para as políticas de I+D dende as súas raizames no local.
O recoñecemento será entregado no vindeiro mes de xaneiro nun acto institucional que contará coa presenza dos Príncipes de Asturias. O concello barbanzán, o único galego que obtivo distinción nesta convocatoria dos premios, mantén a pleno rendemento unha web dende a que informa de recursos e actividades para favorecer o consumo de enerxía responsable, a inserción laboral e/ou dixital ou os hábitos de vida saudable.
O alcalde é Xesús Deira, do BNG. Por certo que nesta mesma liña da innovación, aínda que desta volta no plano urbanístico, Boiro tamén foi protagonista nos medios dixitais hai un ano por un proxecto para encher de cores, ao estilo das vilas escandinavas, o porto de Cabo de Cruz.