Os profesionais galegos apostan por un bo uso da información no Día da Protección de Datos

Tal e como avanzamos esta semana, hoxe venres 28 celébrase o Día da Protección de Datos, evento promovido polo Consello de Europa e que, como ben indica o seu propio nome, diríxese a salientar dúas cousas nunca incompatibles: o acceso universal á información e o dereito das persoas, entidades e empresas a protexer nas redes a información propia de seu. De feito, un dos obxectivos desta efeméride é impulsar o coñecemento dos dereitos en materia de protección de datos e privacidade entre os cidadáns. Así nolo conta o Colexio Profesional de Enxeñaría en Informática de Galicia, unha das entidades que máis ten recalcado a importancia de respectar a privicidade dos individuos na Sociedade da Coñecemento, tanto a través de manifestos e comunicados como en actividades concretas de divulgación. Hoxe venres, o CPEIG publica na súa páxina unha nova declaración institucional.
Nela, entre outras cousas, faise saber o compromiso do colexio no impulso ao coñecemento dos dereitos en materia de protección de datos e privacidade entre os cidadáns. Asemade, o CPEIG tamén recorda a importancia do bo uso da información persoal e do fomento as prácticas respectuosas cos dereitos existentes. O comunicado, que se acompaña da publicación recente dun libro sobre protección de datos (dirixido e coordinado por Rafael Millán e Fernando Suárez e achegando unha de ducia estudos sobre a salvagarda da información), incide tamén nos moitos riscos que poden vir dados por unha inaxeitada xestión dos datos: riscos de manipulación, substracción, suplantación, etc. Polo tanto, indica o colexio, “é necesaria a defensa do individuo e do seu dereito fundamental á protección dos seus datos persoais, recollido na propia Constitución Española, e entendido como a súa facultade para decidir cándo e baixo qué límites debe revelar datos sobre a súa persoa”.
E continúa: “Este poder de disposición sobre os propios datos persoais de nada vale se o afectado descoñece qué datos son os que se posúen por terceiros, quén os posúen e con qué fin; Aa radica a importancia de estar seguro de que o control dos mesmos está, en principio, no ámbito de poder xurídico do propio interesado”.