Proposta colectiva para fomentar a lectura do galego en YouTube

Se antes da Rede os atrancos para facer unha lectura colectiva e perdurable de obras en galego podían ser moitos e variados, agora coas redes sociais e outras ferramentas baixa (e moito) a cifra de impedimentos. A principal vantaxe, entre outras, é que o que se fai pódese recuperar logo con total liberdade e a golpe de click. Asemade, ninguén ten que desprazarse a ningún sitio para ir contribuíndo á iniciativa. Para o equipo de GalegoLab, este que vivimos era o intre indicado para pór en marcha unha lectura global dun libro noso. E por cal comezar? Pois unha das opcións céntrase nunha das nosas obras máis universais e que máis luz botan sobre a nosa identidade: Memorias dun neno labrego, de Neira Vilas.
Amais, 2011 é o ano de Castelao, xa que se celebran os 125 anos do seu nacemento.
O proxecto, que aínda está en desenvolvemento, segue en maior ou menor medida o modelo de outras accións postas en marcha en GalegoLab: achégase unha idea á que se lle vai dando forma e se lle van engadindo apoios ata que se converte nunha realidade. A iniciativa da que estamos a falar aínda está nos primeiros chanzos da escaleira, pero semella que está claro por onde encamiñar os esforzos. Por unha banda precísase unha persoa con coñecemento e tempo libre para crear a canle específica en YouTube (coa súa imaxe gráfica e demais cousas de mantemento), outra para xestionar/compartir a xestión da canle e outras para facer e subministrar os vídeos das lecturas.
Os obxectivos principais pasan por traballar a prol da visibilidade da nosa cultura nas canles globais, facendo uso dunha das súas principais ferramentas: YouTube. Asemade, trataríase de fomentar a práctica da lectura en galego.