Norton presenta un servizo de balde que nos informa das peores ameazas web e de como evitalas

A empresa de seguridade informática Norton presentou esta semana un recurso sobre crime informático dirixido a ternos máis informados e protexidos de cara a ameazas e tentativas de fraude en Internet. O Norton Cybercrime Index, o recurso en cuestión, efectúa entre outras cousas seguimentos continuos e, a maiores, advirte decote sobre os riscos deste tipo de actividades a nivel internacional. O servizo en liña, que xorde nun intre delicado para os usuarios de software privativo (xa que xeralmente os de software libre non teñen o mesmo número de problemas vírico-dixitais), con infeccións cos sistemas Windows no punto de mira e o recente virus Here You Have tentando pechar as comunicacións electrónicas en todo o mundo, encamíñase a acadar a simplicidade e utilidade dunha folla de ruta ou mapa de guerra dos ataques mundiais en liña.
Deste xeito, o Norton Cybercrime Index alerta aos internautas sobre os lugares conflitivos do día, dos posibles perigos, incluíndo as webs máis perigosas da xornada, os termos de busca comprometidos ou as tentativas de estafa máis estendidas, roubo de identidade (phsishing) e correo lixo. Unha das grandes vantaxes da ferramenta é que é de balde e que ademais do devandito incorpora boletíns de novas con partes de ameazas e listaxes de consellos para evitalas do xeito máis eficaz. O Norton Cybercrime Index preséntase en liña, vía un sitio optimizado para teléfono móbil, ou por descarga nun PC.