Iago Soto revela en Vigo as claves do éxito empresarial de Quobis

Segundo podemos ler no Diario da Universidade de Vigo (DUVI), “un estudo da Universidade Complutense realizado entre 1200 alumnos e alumnas amosa que fronte ao 30 por cento que aspira a ser funcionario, tan só o 8 por cento do alumnado mostra interese polo mundo empresarial”.
As verbas extráense dunha nova redactada con motivo da celebración do Programa Ideas Emprendedoras con Valor, organizado pola devandita entidade académica e BIC-Galicia en Vigo, que demostra maxistralmente a falta de iniciativa e de cultura emprendedora que hai no noso país.
Precisamente co obxectivo de fomentar esta cultura empresarial entre os mozos e mozas asistentes, a Universidade de Vigo, ao abeiro da Cátedra Bancaja de Xoves Emprendores, trouxo como relator convidado, entre outros, a Iago Soto, titulado en Enxeñaría de Telecomunicación e socio fundador de Quobis, que na súa intervención apuntou a “falta de cartos, de tempo, de apoio na contorna e de contactos”, como os principais atrancos que atopan no noso país os novos empresarios con ideas creativas.
Soto, que foi o encargado de inaugurar o seminario, conta con sobrada experiencia na contorna empresarial e son moitos os éxitos que colleitou con Quobis, porén o seu recoñecemento non chegou de boas a primeiras e tivo que levantarse despois de caer en varias ocasións con distintas ideas empresariais.
E se tal e como dí o conto, “o que non te mata faite máis forte”, o socio fundador de Quobis levantouse como o Fénix das súas cinzas e con perseverancia levantou a que é hoxe unha das empresas tecnolóxicas máis importantes do mercado español, que malia á crise, pechou o 2010 cun crecemento alto na súa cifra de negocios.
Agora, logo de preto de cinco anos ao mando de Quobis, Soto fala de barreiras e de importantes atrancos que atopou nos seus inicios, porén “con perseverancia” (e coa axuda de entidades como o IGAPE), logrou reunir os cartos suficientes para fundar a súa propia empresa de tecnoloxías emerxentes da comunicación.
Unha vez desmontado o mito dos “cartos”, Iago Soto, que admitiu que “España non era a contorna máis ideal para montar unha empresa”, foi demostrando ao longo da súa intervención que “se non se teme correr riscos”, o do tempo, o apoio e os contactos veñen sós.
Para este ano 2011, Quobis vai apostar por ter presenza na totalidade do seu mercado obxectivo en España e Portugal, así como iniciar actividade comercial en catro países de Latinoamérica.