Sony recoñece que os datos dos usuarios de PSN víronse comprometidos

Que a PlayStation Network leve fóra de liña dende a tarde do pasado día 20 xa é unha nova bastante negativa, que vén de empeorar polo feito de que Sony non está a dar explicacións detalladas sobre o incidente, néganse a dar unha data de restablecemento do servizo e confirman que os datos dos seus usuarios quedaron comprometidos, de xeito que os responsables da intrusión aos servidores da compañía nipona puideron acceder a datos como o nome, enderezo, e-mail, data de nacemento, contrasinal, preguntas de seguridade, identificadores de PSN e mesmo o número da tarxeta de crédito (agás o código de seguridade) e a súa data de seguridade.
Toda esta información supostamente subtraída podería empregarse para roubo de identidade e distintos fraudes, e como solución dende Sony limítanse a aconsellar prudencia con posibles estafas por correo electrónico ou teléfono, á vez que se revise con frecuencia o saldo e movementos das contas bancarias.
Despois de case unha semana aínda están a analizar o acontecido, e ata que remate a investigación non volverán a restablecer o servizo. Para esa labor Sony contratou a unha compañía de seguridade externa, e esperemos que pronto poida saberse se realmente houbo un roubo masivo de datos, pois de ser así a responsabilidade de Sony iría máis aló de recomendar prudencia aos seus usuarios e asegurar que van «proceder agresivamente para atopar aos responsables».
Mentres, os millóns de usuarios da PlayStation 3 non só non poden xogar en liña a moitos dos seus xogos, senón que tamén teñen dificultades para gozar de moitos títulos para xogar en local (pois empregan a PlayStation Network para facer verificacións de seguridade ou sincronizar trofeos). Tamén as desenvolvedoras de xogos están a ter problemas por mor da incidencia, dando a impresión de que a principal beneficiaria desta situación é Microsoft, pois a súa plataforma de xogos en liña é moito máis robusta, e está a operar con total normalidade, experimentando un incremento de uso na última semana, o que tamén podería contribuír a un incremento de vendas da Xbox 360, xa que os usuarios poden desconfiar de Sony para xogar en liña tras esta desfeita.