Máis de 50 persoas participaron no curso sobre negocio na mobilidade organizado polo CPETIG

Na mobilidade hai negocio, e moito. Ademais, dase a casualidade de que se trata dun ámbito produtivo en medre, accesible grazas a estruturas e programas abertos, diametralmente oposto a todos aqueles eidos que nos levaron a onde estamos agora, con este parón que semella unha calexa sen saída. Así nolo contaron os expertos reunidos estes días en Santiago con motivo do curso sobre Como xerar negocio coas aplicacións móbiles que organizou o Colexio Profesional de Enxeñaría Técnica en Informática de Galicia, CPETIG. Segundo informa o Colexio, o curso desenvolveuse ao longo de dous días, de venres a sábado, e contou coa presenza de máis 50 asistentes, aos que se lles informou polo miúdo sobre a potencialidade das aplicacións para os smartphones ou os modelos de negocio que xorden ao abeiro dos sistemas abertos Android, entre outras cuestións.
A actividade, que foi coordinada por Emilio Avilés (director xeral e fundador de TeCHmi e cofundador de Slash Mobility), serviu tamén para debater sobre a implantación das plataformas e tecnoloxías móbiles nas empresas e sobre o retorno do investimento que leva adxunto a inversión na mobilidade.
Xa noutro ámbito, dicir que o Colexio de Enxeñaría Técnica en Informática vai seguir organizando os días vindeiros máis actividades formativas relacionadas coa Sociedade do Coñecemento e as súas aplicacións na mellora do noso xeito de interrelacionármonos, administrativa, empresarial ou persoalmente. Para comezar, entre os días 10 e 12 de maio, o Colexio organiza en Santiago un Seminario sobre Informática Xudicial, Peritaxe Técnico e Proba Electrónica. Desenvolverase en horario de tarde, de 17 a 21 horas, e terá como gran obxectivo o de informar aos xuristas dos avances en materia probatoria nos casos en que interveña o factor informático no proceso, así como dos importantes beneficios da incorporación e uso das novas tecnoloxías no propio proceso xudicial.
Os destinatarios do seminario serán xuíces, maxistrados, secretarios xudiciais e fiscais. A acción formativa desenvolverase na Escola Galega de Administración Pública (EGAP) e será inaugurada, o vindeiro martes 10 de maio, polo director xeral de Xustiza da Xunta de Galicia, e polo presidente do CPETIG, Marcos Mata.
Entre os relatores que participarán nestas xornadas formativas destacan o avogado Victor Salgado Seguín, socio do Bufete Pintos&Salgado, ou o Xefe do Grupo de Delitos Telemáticos da Garda Civil, Juan Salom Clotet.