Emetel afianza o seu crecemento cunha facturación superior aos 3 millóns de euros

A empresa galega Emetel, centrada en servizos de comunicación e sistemas de redes, vén de facer reconto do acadado ao longo de 2010 en materia de medre de negocio e espallamento nos mercados. Estes e outros datos, presentados esta semana, confirman o crecemento sostido amosado pola firma galega nos últimos anos, “acadando unha facturación superior aos tres millóns de euros, circunstancia que a afianza como unha das empresas TIC máis salientables da nosa terra”, informou a compañía con sede na Coruña. Por certo que o ano 2010 pasará á historia da empresa como o primeiro no que Emetel foi quen de ir alén dos 3 millóns de euros.
No que respecta á facturación do ano anterior, este novo volume supón un 7% de crecemento, o que se complementa cunha rendibilidade superior ao 20% e cun medre do equipo de traballo dun 10%, superándose xa a cifra de 40 profesionais. Segundo nos conta Manuel Lago, director xeral da firma, “o exercicio 2010 foi moi positivo, pero non só por ter acadado por vez primeira a cifra dos tres millóns; Emetel parte da filosofía de colaborar no medre dos nosos clientes a través da incorporación de tecnoloxías que lles permitan mellorar en competividade e produtividade”.
E prosegue, facendo referencia á clave da estratexia e á semente deste logros: “Para isto, desenvolvimos solucións específicas en función das súas necesidades e baseadas na innovación: esa é a verdadeira función da tecnoloxía”.
Entre os principais proxectos realizados ao longo de 2010 e que conseguiron levar á empresa galega cara ás devanditas cifras de crecemento, cómpre salientar o paquete de solucións deseñadas para Marineda City (control de accesos, circuíto pechado de televisión, megafonía, radiocomunicacións, portos de información multimedia) ou a remodelación dos Centros de Procesos de Datos do Concello da Coruña. Tamén é moi destacable a creación e posta en servizo do centro de soporte técnico de Innova-Te Lugo posto en marcha pola Deputación provincial.