Técnicos en transferencia de todo o Estado daranse cita en Ourense a partir do 1 de xuño

A transferencia tecnolóxica, o seu nome xa nos adianta algunha clave, consiste no establecemento de comunicacións e colaboracións activas e rendibles entre os eidos de investigación académica e os tecidos produtivos do seu contorno. Na nosa terra, tódalas universidades dan acubillo a nexos de unión desta índole, e a Universidade de Vigo non é unha excepción. Esta toma de contacto coas empresas materialízase na OTRI, oficina de transferencia, un servizo que (por certo) non só mantén ligazóns estreitas co mercado senón tamén con outros servizos análogos do eido galego e estatal.
Froito disto é o evento que nos ocupa, entre o 1 e o 3 de xuño no Campus de Ourense: a Conferencia RedOtri 2011.
Trátase da nova edición dunha serie de xuntanzas anuais e que este ano contará coa participación dun cento de técnicos de 70 universidades de todo o territorio estatal, reunidas co obxectivo de avaliar todo tipo de cuestións ligadas á área do fluxo de coñecemento investigador, facendo especial fincapé nos recursos para facer o máis eficaz posible esta achega de datos, tecnoloxías, programas e recursos.
Segundo informa no boletín do DUVI Ángeles López, directora da OTRI de Vigo, “a conferencia ten como finalidade a posta ao día nos temas máis actuais no mundo da transferencia e reunir ás persoas que se dedican a esta tarefa nas universidades españolas”. A cita, explica, está organizada pola Universidade de Vigo e a Conferencia de Reitores de Universidades Españolas CRUE e conta co patrocinio da Fundación Barrié de la Maza e da Tecnópole.
O evento non será un evento xenérico sen alicerce temático concreto sobre o que debater e abranguer outras cuestións interrelacionadas. De feito, como as anteriores edicións, a convocatoria do Campus de Vigo terá un eixe temático ben claro: a profesión mesma do investigador encargado de transmitir coñecemento. “Este ano está dedicado á nosa profesión, a diferenza doutros anos que se centrou nas tarefas de transferencia propiamente ditas, como son patentes, spin-off ou I+D con empresas”, destaca a responsable da OTRI viguesa.
Deste xeito, os asistentes afondarán en cuestións coma os sistemas de acreditación que existen a nivel internacional para os profesionais da transferencia de coñecemento e as cualificacións e competencias necesarias para ser un bo xestor neste eido.