Un xogo para Xbox 360 ensinará defensa persoal coa axuda de Kinect

Ubisoft vén de dar detalles dun novo xogo para a Xbox 360 que precisará do sensor Kinect para o seu uso, Self-Defense Training Camp, que sería o primeiro videoxogo que axudaría a adquirir confianza para reaccionar ante ataques físicos, como se dun cursiño de defensa persoal se tratase.
Este xogo combinaría adestramento de fitness con técnica de defensa persoal, dividindo as actividades en 4 categorías principais: técnica, resistencia, compostura e reflexos. Grazas ao Kinect o xogo pode seguir os movementos do usuario, para axudalo a adquirir os coñecementos básicos de defensa persoal, para o que recompila distintas rutinas inspiradas no kickboxing e en distintas artes marciais, buscando tamén mellorar os nosos reflexos a través de mini-xogos.
Está anunciado o seu lanzamento nos EE.UU. o vindeiro 8 de novembro, mentres que a Europa chegaría o 11 de novembro co título de Kinect: My Self-Defence Coach.

Trailer do xogo