Bota a andar Imaxerali, web-comunidade en galego sobre o eido do motor

Quen queira información en galego sobre unha cuestión específica, na Rede, ten cada vez máis posibilidades de conseguila. Se onte falabamos nesta web da posta en marcha dunha revista-web sobre fútbol, Kubus, hoxe é a quenda de presentar Imaxerali, unha nova páxina no noso panorama redeiro, sen dúbida un espazo de apoio para que a nosa comunicación medre, agora que as posibilidades de facelo pola vía tradicional (en papel e nos quioscos) xa non son as mesmas cás de antes. A páxina, toda ela na nosa lingua, xira arredor dos temas aos que apunta o seu nome: é un percorrido fundamentalmente visual polas principais competicións de rali galegas e estatais.
O servizo, unha fonte de material gráfico (imaxes, vídeos) e información especialmente relevante para todos os seareiros deste deporte (calendario, novas sobre o eido do motor e as competicións) vén da man dun veciño do concello de Teo, Miguel Fernández Ares, fotógrafo especializado no mundo dos ralis e cunha máis que longa traxectoria creativa e profesional cubrindo os principais circuítos de España, Portugal e boa parte de Europa (ralis de montaña, autocrós e outro tipo de exhibicións).
Na web da que estamos a falar non só se vai amosar o seu traballo gráfico, senón que tamén convida aos restantes seareiros (do motor e da fotografía) a que expoñan ante o mundo as súas respectivas achegas. En boa maneira, concíbese como un froito do seu tempo: funciona a xeito de rede social ou punto de encontro para dar acubillo a quen teña interese, na nosa terra, arredor desta cuestión. Así nolo explica Miguel: “A web conta cun apartado específico de proxección e apoio ás novas xeracións de fotógrafos do mundo do rali, onde poderán compartir as súas imaxes con escuderías, equipos e pilotos profesionais”.
O proxecto, que xa é unha realidade, comezou sen grandes apoios nin investimentos, cunha cámara e coa ilusión de facer un bo traballo, ao que cómpre engadir dous factores fundamentais: o desexo de amosar o traballo xerado e, a maiores, de conseguir que os demais internautas teñan tamén a mesma oportunidade. O comezo da web tivo un claro precedente: tres anos de seguimento das principais citas automobilísticas estatais para capturar os seus mellores intres. Ao cabo disto, sinala Miguel, quedou claro que había que compartir o traballo xerado cos demais, e que as redes (a web propia, o blog e a axuda das súas vertentes nas redes sociais, Flickr, Facebook, Twitter) fornecían dunha boa oportunidade para isto.
O desenvolvemento da páxina-portal levouse a cabo ao longo de seis meses, sendo o seu obxectivo o de achegar un portal interactivo “pensado tanto para apaixonados do mundo do rali como para fotógrafos profesionais e onde poder descubrir interesantes imaxes en múltiples eventos deportivos de primeiro nivel e as últimas novidades no eido do motor”.
Para facérmonos unha idea do que ofrece arestora a web, dicir que podemos participar xa en percorridos polo WRC Rally de Portugal, o Rali Ría de Noia, a Subida a Oia, o Rali Comarca da Ulloa ou a recentemente celebrada XXXII Rampa Internacional de Falperra, tamén no país veciño. “E non vai parar de estar presente en novas probas”, engade Miguel, que xa nos anuncia que visitará o 48º Rali Rías Baixas con prescrición para o campionato europeo, durante o venres 1 e sábado 2 de xuño.