Kickstarter permitirá facer realidade o xogo Zombie Playground

Un mundo dos videoxogos é un dos sectores que máis está a recorrer ultimamente ao crowdfunding para facer realidade proxectos que doutro xeito non acadarían editor ou financiamento para chegar ao mercado, pois deste xeito, conceptos de xogo arriscados ou polémicos poden darse a coñecer e sumar apoios que en moitos casos non son máis que compras anticipadas que garanten a súa viabilidade cando aínda están a desenvolverse. Este é o caso de Zombie Playground, un atrevido xogo de acción de zombis no que os personaxes son nenos, o que non botou atrás a preto de 3.000 mecenas que fixeron que antes de rematar o prazo proposto se achegasen máis de 100.000 dólares.
Con estes cartos Massive Black pretende conseguir que este xogo de nenos, que non é para nenos, vexa a luz. Serían un título en liña, baseado en equipos, con elementos de RPG, no que uns cativos deberán sobrevivir a un apocalipse zombi no seu colexio, facendo uso de numerosas armas, no que os seus responsables consideran que é unha mestura das películas Goonies e Attack the Block coa serie Walking Dead.
As achegas económicas conseguidas polo momento permitirán o desenvolvemento dun xogo para PC e Mac que na súa versión alfa permite partidas cooperativas de 2 xogadores en liña, para que na versión final permita xogar a 4 xogadores á vez. Os personaxes poden asumir 2 clases diferentes, terán numerosas armas, poderá personalizar a súa roupa e contarán con numerosos elementos de RPG (como habilidades específicas e sistema de niveis).
De ter acadado máis cartos o xogo podería ter saído tamén para Linux, contar con modos de xogo de 2 contra 2 e 4 contra 4, adoptar o modelo de negocio free to play e moitas outras características que polo momento non parecen posibles.

Vídeo dunha versión pre-alfa que pode dar unha idea de como será o xogo