Esta tarde tivo lugar en Colonia a conferencia de Sony de cara á Gamescom que comeza mañá, aproveitándose a ocasión para colocar no escaparate os xogos que Sony vai vender de cara ao Nadal e para dar a coñecer novos títulos. Entre os anuncios realizados destaca a importancia que deron á PS Vita, o que parecía querer compensar a marxinación da nova portátil de Sony durante a pasada edición do E3.
Entre os novos título que teremos para PS Vita destaca Tearaway, obra do estudo Media Molecule (responsable da franquía LittleBigPlanet) que semella ir dirixido a todos os públicos; mentres que por outra banda Sony quere gañarse aos xogadores máis hardcore con Killzone: Mercenary, xogo de acción en primeira persoa que aproveita ao máximo as capacidades gráficas e as características da PS Vita.
Entre as novidades tamén figuraban xogos para PlayStation 3, como Puppeteer, Rain e Until Down, destacando este último por ser un xogo de terror adolescente que precisa de PlayStation Move como sistema de control.
Killzone: Mercenary será un dos pratos fortes da PS Vita
Cross-Buy para PS Vita
A partir do 28 de agosto tamén será posible adquirir os xogos de PS One Final Fantasy VII, Metal Gear Solid e Resident Evil 2 dende a PS Vita, uníndose máis destes xogos da primeira PlayStation nos vindeiros meses.
A xente de EA Sports tamén aproveitou o momento para anunciar que o agardado FIFA 13 chegará ás tendas europeas o vindeiro 28 de setembro, incluíndo compatibilidade con PlayStation Move.
Último trailer de The Last of Us
