O novo Devil May Cry estrea demo

O Bazar de Xbox LIVE recibiu hoxe a versión de demostración de DmC, a nova entrega da franquía de Devil May Cry que busca a renovación, e que dende hoxe poden probar os usuarios da Xbox 360 que gocen de contas Gold, mentres que os usuarios da PlayStation 3 recibirán a demo mañá mesmo. Este adianto do xogo protagonizado por un Dante redeseñado presenta 2 misións (Under Watch e Secret Ingredient) que permiten recorrer as rúas da cidade do xogo e enfrontarse a un demo Súcubo para ter unha idea de como son os combates finais no título que chegará ás tendas o 15 de xaneiro.

Na demo será posible elixir entre 3 niveis de dificultade e, de superar as 2 misións incluídas, desbloquearase a demostración do modo Son of Sparda, o desafío máis difícil da demo, cunha serie única de inimigos máis duros e vagas de inimigos aos que enfrontarse. Durante estas misións Dante fará uso da súa espada Rebellion, das súas pistolas Ebony e Ivory, de súa machada demoníaca Arbiter e da súa gadaña anxélica Osiris, permitindo así que nos fagamos unha idea das posibilidades de combate que ofrecerá o xogo final.