Gato Salvaje desenvolverá unha aventura gráfica de fantasía épica

Esta semana a pontevedresa Smiling Goblin e a coruñesa Gato Salvaje, compañías dedicadas á elaboración de videoxogos, asinaron un acordo de colaboración que abre as portas do vindeiro videoxogo da saga Krynea, unha aventura gráfica que xurdirá froito da colaboración de ambas casas e pretende ver a luz en 2014.
As compañías galegas buscarán cadrar as súas axendas de desenvolvemento a finais de ano, procurando dar un pulo ao sector dos videoxogos clásicos, aumentando a súa competitividade fronte a grandes produtoras internacionais. Smiling Goblin quere converter a Krynea (proxecto iniciado en 2010 con Krynea: Imperial Wars e que este ano trasladarase ao xogo de cartas Krynea: Battlefield) nunha experiencia de lecer completa que poida consolidarse como un clásico da fantasía épica, obxectivo que axudará a conseguir Gato Salvaje, que aportará a súa experiencia na creación de aventuras gráficas.