Os creadores de Dead Island preparan un novo survival horror

Warner Bros Interactive Entertainment anunciou hoxe Dying Light, un xogo de acción en primeira persoa dentro do xénero do survival horror ambientado nun mundo aberto e que destaca polos seus ciclos de día e noite que afectan drasticamente ao xeito de actuar neste título que está a ser desenvolvido por Techland (estudo detrás de Dead Island) para PS3, PS4, Xbox 360, Xbox One e PC, agardando que estea dispoñible durante 2014.
O xogo sitúa ao xogador de día nun contorno urbano que explorar, buscando subministros e armas para poder enfrontarse a unha crecente poboación de infectados, mentres que pola noite o cazador convértese en cazado, e os infectados vólvense agresivos e perigosos, polo que sobrevivir ata o seguinte amencer será todo un reto.
Dying Light promete ser un xogo moi completo, cunha mecánica de survival horror pola noite; movementos libres que poden servir tanto para fuxir dos inimigos máis perigosos como para saltar entre edificios coma se estivésemos en Mirror’s Edge; un mundo de grande tamaño con variade de inimigos; diversidade de armas que permiten dende uns brutais combates corpo a corpo ata disparar dende certa distancia; armas personalizables (na liña do mencionado Dead Island); e un novo motor gráfico (Chrome Engine 6) que promete estar á altura das consolas de nova xeración.