The Last of Us lidera as vendas de videoxogos en Reino Unido por cuarta semana consecutiva

O xogo de Naughty Dog The Last of Us, pese a ser exclusivo para PlayStation 3, está a converterse no grande éxito de vendas do presente ano, tendo moitas bazas para converterse no mellor xogo de 2013 pese a que tal galardón tenda a recaer en títulos que se estrean de cara á campaña de Nadal, e como mostra deste éxito temos que no Reino Unido é o primeiro xogo do presente ano en conseguir liderar as vendas durante 4 semanas consecutivas, algo que non acadaron grandes títulos como Bioshock Infinite ou Tomb Raider.
A listaxe de vendas británica situaría nun segundo posto a versión de Xbox 360 de Minecraft, seguido por FIFA 13, Animal Crossing: New Leaf e Assassin’s Creed III, xogos con bastante traxectoria, o que fai que o logro acadado por Naughty Dog sexa aínda máis destacable. Na mesma listaxe tamén destacan algúns títulos que están a conseguir unha resposta mellor da que poderiamos agardar, como o xogo de Masacre (Deadpool en inglés) que conseguiu un meritorio posto 9º en vendas cando estamos ante un título bastante modesto que como principal atractivo ten a mestura de violencia e humor (e non precisamente o seu apartado técnico). Como a única novidade da última actualización da listaxe de vendas estaría Project X Zone, xogo de loita de Namco Bandai para Nintendo 3DS que conseguiu facerse un oco no posto 18, o que non está nada mal para un título de tal xénero para unha consola portátil.