Un novo xogo musical causa furor en Windows Phone

Nun momento no que os xogos musicais tipo Rock Band ou Guitar Hero están fóra do mercado poderiamos pensar que non existe demanda deste xénero, pero a realidade non parece concordar, e como grande exemplo de que os xogos que permiten facer uso de temas musicais reais poden seguir a callar no público temos a recente chegada á Windows Phone Store de SongArc, un título que na súa primeira semana conseguiu liderar a categoría de música da tenda de aplicacións e converteuse nun dos xogos mellor valorados, con máis de 800 puntuacións que danlle unha nota media de 4,8 sobre 5.
SongArc é un xogo que permite reproducir a música que teñamos cargada no noso móbil, sempre que algún usuario tivese creado a súa partitura virtual para poder interpretala ao xeito do xogo, que consiste nun arco de cores ao que van parar estrelas descendentes sobre as que temos que premer cos dedos. O xogo tamén ten a posibilidade de activar a posibilidade de seguir a batería, de xeito que de cando en vez aparecerá unha onda na pantalla que incrementará a nosa puntuación se movemos o móbil no momento que cruza o arco multi-cor. Non faltan no xogo barra de enerxía e barra de combos (para poder activar un modo especial cando está chea), moi na liña dos títulos musicais de Harmonix.
Uns 15.300 usuarios descargaron xa SongArc, crearon unhas 1.800 partituras e botaron unhas 83.288 partidas, cantidades que posiblemente se multipliquen en poucas horas, ao saberse do bo inicio que está a ter este xogo que podemos descargar de balde e que non sería de sorprender que en poucos meses contase con versións para outras plataformas móbiles repetindo o éxito actual.