Oceanhorn, un xogo para iOS imprescindible para os seareiros de The Legend of Zelda

Hai un par de anos soubemos que os fineses Comfox & Bros estaban a traballar en Oceanhorn: Monster of the Uncharted Seas, considerado como o Zelda de iOS (pola súa semellanza co xogo The Legend of Zelda: The Wind Waker), xogo que finalmente veu a luz para iPhone e iPad a un prezo de 7,99 euros, que parece máis que xustificado se vemos que é un xogo que garante máis de 10 horas de diversión a través da súa historia, conta cuns gráficos moi coidados e incluso goza dun excepcional apartado sonoro grazas á música de mestres como Nobuo Uematsu (principal autor dos temas de Final Fantasy) e Kenji Ito (creador da música das series Mana e SaGa).
Oceanhorn métenos na pel dun neno que ten que explorar as illas dos mares inexplorados para converterse nunha lenda ao percorrer un mundo cheo de perigos, resolver múltiples quebracabezas, enfrontarse a monstros, aprender a usar a maxia e descubrir tesouros antigos. Este xogo de acción e aventuras ten uns impresionantes gráficos 3D (polo que é esixente en hardware, de xeito que só funciona en dispositivos a partir de iPhone 4S, iPod Touch de 5ª xeración e iPad 2 ou mini), manéxase mediante xestos táctiles e tamén é compatible con mandos de xogos (en iOS 7).
Este xogo editado por FDG Entertainment conta con textos en varios idiomas (entre os que non faltan o español e o portugués) e promete converterse en todo un referente para os amantes das aventuras de Link na popular saga para consolas de Nintendo.

Vídeo promocional de Oceanhorn