Steam permite xogar en remoto dende outros ordenadores no fogar

A plataforma de xogos para PC Steam actualizou a súa aplicación oficial para incorporar unha nova funcionalidade chamada In-Home Streaming, que consiste en permitir xogar aos títulos instalados dende o ordenador principal no fogar dende outros equipos conectados á mesma rede local para o que faise uso da tecnoloxía de streaming, ou sexa, que poderíase xogar en remoto dende outros equipos informáticos que funcionen con Windows, OS X, Linux e SteamOS, agardándose que máis adiante se incorporen outras plataformas dotando a esta plataforma de xogo dunha versatilidade sen precedentes.
Esta tecnoloxía non só permitiría que puidésemos, por exemplo, gozar dun xogo de PC nun portátil Mac, senón que tamén facilitaría que ordenadores de pouca potencia sirvan para correr xogos esixentes (xa que será o ordenador que fai de servidor o que executará realmente o xogo). Amais, esta solución non ancoraría os xogos ao escritorio informático, senón que podería levarse a equipos portátiles ou incluso ao televisor do salón, sen ter que facer varias instalacións do mesmo xogo nin ter que contar con varios ordenadores equipados co último hardware.
Para poder gozar desta funcionalidade chegará con rexistrarse en Steam dende varios equipos na mesma rede local, aparecendo a posibilidade de realizar o streaming de xogos dende a propia biblioteca de títulos dispoñibles. Cómpre destacar que para poder gozar desta funcionalidade é recomendable que o equipo principal no que estean instalados os xogos de Steam para reproducir en remoto teña unha grande potencia, xa que aparte do correr o xogo tamén deberá xerar un sinal audiovisual en tempo real que permita o seu uso remoto (de feito, o ordenador que fai de servidor non podería empregarse para outras cousas durante as retransmisións de xogos).