Os produtores galegos de videoxogos reivindican o seu recoñecemento como industria cultural

En Galicia leva anos desenvolvéndose unha industria do videoxogo, con cada vez máis empresas intentando saír adiante nun sector tan competitivo, pero con tanto potencial de futuro, o que leva aos produtores desta industria cultural a reclamar das institucións públicas máis axudas, apoio para a profesionalización desta actividade e o seu recoñecemento como unha industria específica que actualmente está nun punto intermedio entre a cultura e a tecnoloxía que a deixa fóra do apoio institucional.
Por exemplo, Fernando Prieto, director xeral de Gato Salvaje, salienta que o sector dos videoxogos “é netamente exportador”, sendo preciso facilitar o financiamento e unha estrutura fiscal máis favorable, seguindo os pasos de países anglosaxóns. Tamén critica que “en España cobramos impostos a todos e damos subvensións a algúns; é inxusto porque non tes as mesmas oportunidades”, explicou a Europa Press.
Esta situación está a levar aos produtores galegos de videoxogos a unir forzas nunha asociación que poida servir para darlles unha voz única e facilitar así unha interlocución directa coa Administración, coordinar accións e canalizar liñas de apoio, así como permitirlles ter presenza en feiras que faciliten o posicionamento nos mercados internacionais das súas creacións.

A formación tamén é unha importante eiva que atopa o sector, pois como comenta Xosé Manuel Rey, director xeral de Iberian Games, “non hai un centro de formación específica como pode habelo noutras zonas” como Madrid ou Barcelona, o que impide dotar de capital humano ao sector. Falta así en Galicia algún grado ou máster específico que poida contribuír a formar profesionais para esta industria que ten cada día un maior peso na economía global.
A nivel estatal o Libro Branco do Desenvolvemento Español dos Videoxogos elaborado por DEV indica que Galicia representa o 3,4% das empresas do sector dos videoxogos, sendo a sexta comunidade autónoma española en número de compañías que se dedican a tal actividade, o que dá a entender que é posible consolidar o sector para convertelo nun xerador de emprego e riqueza, que pode ser cada vez máis produtivo se aproveita as sinerxías que poden xurdir da colaboración das pequenas empresas que o compoñen actualmente.