Nintendo debulla os seus lanzamentos para os vindeiros meses

Hoxe tivemos un novo Nintendo Direct, vídeo no os directivos da compañía xaponesa Satoru Iwata e Satoru Shibata deron conta dos lanzamentos de cara á primavera de Nintendo 3DS e Wii U, destacando o feito de que, antes da vaga de novos xogos, chegará tamén a agardada renovación da Nintendo 3DS, con consolas portátiles con controis mellorados e un incremento de potencia que abriría unha pequena fragmentación no catálogo de xogos (xa que algúns títulos serán exclusivos para as novas máquinas).
As consolas portátiles New Nintendo 3DS e New Nintendo 3DS XL incluirán un segundo stick dixital (de menor tamaño), unha tecnoloxía de pantalla 3D de maior estabilidade (incrementado a confortabilidade do seu uso), un procesador máis potente, unhas descargas tamén máis rápidas e tamén NFC (para poder gozar das figuras interactivas amiibo, o que provocará tamén que o xogo Super Smash Bros. para 3DS reciba unha actualización para engadir o soporte desta tecnoloxía dun xeito análogo á versión de Wii U do mesmo título). A data de lanzamento destas novas consolas será o 13 de febreiro.
Unha novidade moi interesante que tamén chegará a través das consolas portátiles de Nintendo é o Anime Channel, un servizo de vídeo baixo demanda que permitirá que os usuarios europeos poidamos gozar de series de animación xaponesa como Pokémon, Kirby e Inazuma Eleven, que estarán accesibles con só descargar a aplicación correspondente de balde, estreándose este servizo tamén o 13 de febreiro.
Outros xogos para as portátiles dos que se deron detalles foron un novo título da saga Fire Emblem, o agardado Monster Hunter 4 Ultimate (que virá acompañado por un lote que inclúe unha edición especial da New Nintendo 3DS XL coa aparencia do xogo, que tamén chegará ás tendas o 13 de febreiro), Xenoblade Chronicles 3D (dispoñible o 2 de abril), The Legend of Zelda: Majora’s Mask 3D (remake do xogo de Nintendo 64 que veremos a partires do 13 de febreiro e que tamén contará cun lote cunha New Nintendo 3DS XL inspirada no xogo), IronFall: Invasion (dispoñible en formato descargable en febreiro), o combinado Puzzle & Dragons Z + Puzzle & Dragons: Super Mario Bros. Edition (que chegarán en maio, e supón a confirmación de que esta licenza de Super Mario chegará a Europa), Code Name: S.T.E.A.M. (dispoñible o 15 de maio), Pokémon Suffle (un curioso free-to-play baseado en Pokémon que verá a luz en febreiro) e Ace Combat: Assault Horizon Legacy + (dispoñible en febreiro).

Dá a impresión de que as portátiles son a grande aposta de Nintendo para os vindeiros meses, pero a Wii U non estará desamparada, senón que tamén anunciaron que contará nos vindeiros meses con grandes títulos como Splatoon (esperado para o mes de maio), Mario Party 10 (previsto para o 20 de marzo), Captain Toad: Treasure Tracker (que estará dispoñible o 20 de marzo), Xenoblade Chronicles X (do que só concretan que sairá en 2015) e algún que outro título máis entre os que podemos destacar que os xogos de Wii poderán adquirirse como títulos descargables para Wii U, que comezarán polos títulos Super Mario Galaxy 2, Donkey Kong Country Returns e Metroid Prime Trilogy, que venderanse inicialmente a 9,99 euros cada un, pero tras a primeira semana de promoción custarán 19,99 euros.

Vídeo íntegro co Nintendo Direct de hoxe