Ubisoft toma medidas contra os códigos de descarga fraudulentos

Xa temos comentado certas polémicas provocadas pola compra de códigos de descarga de videoxogos en Steam, que chegaron a ser bloqueados internacionalmente por Valve desde certos territorios para, por exemplo, reaccionar ante a flutuación da moeda rusa, e agora entre nesta loita Ubisoft, xa que dende a pasada fin de semana está a desactivar códigos de xeito activo por terse adquirido e revendido a través de páxinas web non autorizadas.
Concretamente apareceron múltiples usuarios nos foros de Ubisoft que queixáronse de que o xogo Far Cry 4 foi borrado das súas respectivas bibliotecas, e admitindo que mercaran o xogo en plataformas alternativas para facer asumible a compra dos títulos (xa que dado o valor das moedas dos seus países os xogos sairíanlles a un prezo equivalente a uns 200 euros, o que claramente queda fóra do alcance da meirande parte de xogadores). Os usuarios protestan polo feito de que a compañía, en vez de tomar medidas contra os revendedores, actúe contra os usuarios finais, que si pagaron polos xogos que agora están a eliminar das súas contas.
Ao parecer, Ubisoft non estaría a actuar contra códigos simplemente mercados internacionalmente, senón adquiridos polos intermediarios mediante fórmulas fraudulentas (como empregando tarxetas de crédito fraudulentas, para logo facer negocio coa revenda).
Cómpre destacar que a diferenza de prezos entre as tendas dixitais oficiais fóra dos períodos de rebaixas e as alternativas son moi levadas, de xeito que, por exemplo, o mencionado Far Cry 4 está á venda en Uplay por 62,95 euros na súa edición para PC, mentres que en Kinguin custaría 32,29 euros e en G2A.com venderíase a 27,99 euros, prezos que claramente atraen aos usuarios a non pagar o prezo completo dos títulos máis buscados.
ACTUALIZACIÓN: Ubisoft asegura que os códigos cancelados corresponden a compras feitas con tarxetas de crédito roubadas e as compañías que comercializan os códigos din que van compensar aos usuarios aos que lle eliminasen os xogos das súas bibliotecas.