Disney abandona a produción de videoxogos para consolas

Hai poucas semanas Disney Interactive anunciou ampliacións do xogo Disney Infinity 3.0 co Play Set Marvel Battlegrounds (que inclúe un modo de xogo de loita para 4 xogadores e personaxes como o Capitán América, Ant-Man e Black Panther incluídos de serie e Hulkbuster, Ultrón e o Spider-Man co traxe negro á venda por separado) e personaxes como Boba Fett e Kylo Ren (de Star Wars) ou Baloo (do Libro da Selva), aos que está previsto que sigan novos personaxes de Alicia a través do espello e Buscando a Dory; pero o que parecía un camiño de rosas no mercado dos videoxogos asociados a figuras coleccionables, parecen ter atopado unha pedra no camiño, e pese aos moitos progresos desta franquía a Disney decidiu botarlle o peche, polo que tras o verán non lanzarán novos produtos desta liña.
Ao parecer, a compañía non estaba disposta a continuar con Disney Infinity ante o risco que supón un produto deste tipo, no que non só hai que desenvolver videoxogos e ampliar constantemente os seus contidos, senón que tamén hai que producir figuras físicas das que non se pode coñecer previamente a súa demanda. Pero non só deixarían de lado os videoxogos baseados en figuras coleccionables, senón que fan o mesmo con videoxogos de consola en xeral, por considerar que é un negocio demasiado dinámico, e prefiren investir en ámbitos máis estables.
O estudio Avalanche Software, responsable de Disney Infinity, botará definitivamente o peche, o que supón prescindir duns 300 postos de traballo. Pese a ser unha dura decisión, parece que o pulo inicial de Disney Infinity non era sustentable, e no último trimestre tal división rexistrou unhas perdas de 147 millóns de dólares, provocada principalmente polo “custo dos produtos” en inventario.