A APTE homenaxea ao Parque Tecnolóxico de Vigo no 20 aniversario da súa constitución

xoves, 19 de outubro do 2023 S. P.

A Asociación de Parques Científicos e Tecnolóxicos de España (APTE) homenaxeou este xoves 19 de outubro ao Parque Tecnolóxico de Vigo (PTVigo), que este 2023 conmemora o vixésimo aniversario da súa posta en funcionamento. A persoa encargada de recoller o recoñecemento foi Ana Mejías Sacaluga, vocal substituta da delegación do Estado no Consorcio da Zona Franca de Vigo e concelleira do Concello de Vigo.
O Consorcio da Zona Franca de Vigo forma parte da APTE desde que se proxectou o Parque Tecnolóxico en 1996 e, actualmente, participa na entidade coa marca Parque Tecnolóxico de Vigo (PTVigo), que integra tres enclaves que configuran un completo ecosistema tecnolóxico: o Centro de Iniciativa Empresarial (CIE) A Granxa, situado en Porriño, que iniciou a súa actividade en 2003; o Parque Tecnolóxico e Loxístico de Vigo, emprazado na cidade olívica entre as parroquias de Beade e Valladares e inaugurado en 2004; e a área empresarial de Porto do Molle, en Nigrán, cuxa posta en funcionamento data de 2010.
O PTVigo, cunha superficie conxunta de 1.500.000 metros cadrados, alberga actualmente 300 empresas con máis de cinco mil traballadores. Pon ao dispor do ecosistema empresarial e de coñecemento parcelas en venda e alugueiro de oficinas, locais e naves; un Centro de Negocios e un Centro de Iniciativa Empresarial con 30 niños e 13 mini naves; unha incubadora tecnolóxica con 14 módulos; 10 talleres industriais para emprendedores; 3 espazos de coworking, salas de reunións, aulas e un auditorio con capacidade para 300 persoas; un Edificio Tecnolóxico Aeroespacial e máis espazos de laboratorio para o sector biotecnolóxico.
O Consorcio da Zona Franca ofrece ademais servizos de apoio ás entidades do Parque como a sociedade de capital risco Vigo Activo; as acelerador de proxectos empresariais ViaGalicia, Business Factory Auto (BFA) e High Tech Auto (HTA); a aceleradora para procesos de internacionalización Viaexterior e Viatextil; o servizo de base de datos e información para empresas ARDÁN; así como foros de orientación estratéxica e obradoiros de traballo, asesoramento e apoio empresarial.
A Asociación de Parques Científicos e Tecnolóxicos de España (APTE) é unha asociación sen ánimo de lucro cuxo obxectivo principal é colaborar, mediante a potenciación e difusión dos parques científicos e tecnolóxicos, á renovación e diversificación da actividade produtiva, ao progreso tecnolóxico e ao desenvolvemento económico.
APTE é membro asociado da Asociación Internacional de Parques Científicos e Tecnolóxicos e Áreas de Innovación (IASP) e actualmente conta con 58 membros repartidos por toda a xeografía española.
Estes parques albergaban a finais de 2022 un total de 5.780 entidades que facturaron 25.148 millóns de euros e proporcionaron emprego a 150.624 persoas, das que 34.190 dedícanse a tarefas de I+D.

PUBLICIDADE