A Aula CeMIT de Ames achega este verán unha completa formación TIC para pequenos e maiores
martes, 30 de maio do 2023
A Aula
CeMIT de Ames compartiu detalles sobre a súa intensa axenda
formativa para este verán, que inclúe cursos pensados para todos os
públicos, lúdicos e formativos. Ademais, continuarase ofrecendo
o acceso libre á aula, que permanece aberta ao público de luns a
venres, dende as 9:30 ata as 13:00 horas; e os martes e xoves tamén
dende as 16:30 ata as 19:00 horas. Así mesmo, ofértase atención
telefónica e por correo electrónico os luns, mércores e venres,
dende as 16:00 ata as 18:30 horas. A partir do 3 de xullo, o horario
das aulas será de luns a venres, dende as 8:15 ata as 13:50 horas.
Cursos para menores de idade
Dende
o 26 de xuño ata o 24 de xullo celebrarase un curso de informática
lúdica para nenos/as de entre 6 e 8 anos. Será os luns, de 10:30 a
12:00 horas. Nel, os pequenos da casa poderán aproveitar para
aprender a manexarse co ordenador e os seus programas da forma máis
entretida posíbel: mediante xogos e actividades acostumaranse ao
rato e ao teclado, pero tamén a entender o funcionamento básico da
computadora.
Entre o 27 de xuño e o 18 de xullo haberá outra
formación: Scratch en verán. A ferramenta scratch é
unha linguaxe de programación por bloques “moi visual e adecuada
para que os rapaces e rapazas comecen a usar a lóxica da informática
na programación, dando pé a que se adentren na robótica
educativa”, informan dende a organización. Diríxese á rapazada
de entre 8 e 12 anos, e desenvolverase os martes de 10:00 a 12:00
horas.
Para os adolescentes de 12 a 16 anos haberá un
curso de edición de imaxes, son e vídeo, que se impartirá do 28 de
xuño ao 26 de xullo; os mércores, de 10:00 a 12:00 horas. Nel a
rapazada aprenderá dende crear editar imaxes ata fotomontaxes, así
como a editar audio e montar vídeos. Empregaranse ferramentas como
GIMP, Audacity e OpenShot.
Doutra banda, haberá unha formación de
introdución á mecanografía. O curso impartirase para dous grupos:
un será para rapaces de entre 7 e 10 anos; e o segundo para os de
entre 11 e 14 anos. Nel empregarase unha plataforma online coa
que o alumnado poderá continuar practicando en calquera momento
dende a súa casa. O curso desenvolverase entre o 29 de xuño e o 27
de xullo. Para os cativos/as de entre 7 e 10 anos terá lugar os
xoves de 10:00 a 11:00 horas; mentres que para os de entre 11 e 14
anos impartirase de 11:00 a 12:00 horas.
Todos os menores de idade que queiran participar
en calquera dos cursos deben estar rexistrados previamente na rede
CeMIT. A inscrición pódese facer premendo
na ligazón específica habilitada ou de xeito presencial, no
primeiro andar da Casa da Cultura de Bertamiráns.
Cursos para adultos
No caso
dos adultos, ofértanse dúas formacións. Por un lado, o curso Atopa
na rede: busca avanzada en Internet. Desenvolverase dende o 29 de
maio ata o 23 de xuño, todos os luns, mércores e venres, de 10:00 a
12:00 horas. As prazas xa están cubertas, aínda que as persoas que
o desexen poden anotarse e quedar en lista de espera. Será de xeito
presencial.
Por outra banda, ofrécese tamén un curso que se
pode realizar dende a casa, a través de Youtube, Crea o teu blog
persoal! Celebrarase do 5 ao 28 de xuño, os luns e mércores, de
16:30 a 18:00 horas. Dende a Aula CeMIT enviarase por correo
electrónico aos participantes a información necesaria para acceder
a cada unha das sesións, así como un breve titorial para descargar
e instalar os programas necesarios para o seguimento dos cursos.
“Crea o teu blog persoal!” é un curso
centrado na creación dun blog persoal, comezando dende a
configuración básica ata opcións de deseño máis avanzadas.
Empregarase Blogger como plataforma de exemplo.
A inscrición aos cursos, tanto para adultos como
para a rapazada, pódese facer chamando ao número de teléfono 682
373 753, escribindo ao enderezo electrónico cemit.ames@xunta.gal
ou presencialmente, nas instalacións da aula (no primeiro andar da
Casa da Cultura de Bertamiráns).