A Aula TIC PEME da Universidade de Santiago aposta pola inclusión social e laboral
luns, 20 de xaneiro do 2020
A
Aula TIC PEME (ATP) da Universidade de Santiago (campus lucense)
comezou o ano fomentando a confluencia entre novas tecnoloxías da
información (o fío temático principal da súa actividade
formativa), por unha banda, e solidariedade e inclusión, pola outra.
Desta arela xurdiu unha iniciativa concreta coa que comezar 2020: a
posta en marcha do
proxecto Edison, unha proposta da aula directamente encamiñada a
mellorar a empregabilidade das persoas con algunha diversidade
funcional.
Sería
o único proxecto do Campus de Lugo incluído no
programa de Micromecenado da USC, unha achega para promover
desenvolvementos de alto impacto social mediante a captación de
fondos e recursos que faciliten a súa posta en marcha.
O
proxecto Edison, concibido coa “vocación de achegar a un colectivo
de persoas en risco de exclusión social a opcións de emprego de
maior calidade”, ofrece un amplo programa de formación teórica e
práctica, tralo que as persoas usuarias poderán completar estadías
profesionais en empresas e entidades públicas.
Segundo
informa a Aula TIC, o conxunto de beneficiarios desta iniciativa
“obterán un certificado universitario oficial acreditativo dos
coñecementos empresariais adquiridos e das habilidades sociais
desenvolvidas durante o período de formación teóricas, cuxas
sesións presenciais terán lugar nas instalacións da Facultade de
Administración e Dirección de Empresas do Campus de Lugo”.
A
aula tamén explica que “o éxito do proxecto Edison depende en boa
medida da implicación da sociedade e do tecido empresarial nesta
iniciativa”. Por esta razón, os seus responsábeis convidan á
comunidade a colaborar con esta proposta de “marcada pegada social”
a través do devandito programa de micromecenado posto en marcha pola
USC.
A
Aula
TIC PEME engade que as persoas que opten por facer achegas económicas
ao proxecto Edison a través do programa de crowdfunding
habilitado pola USC poderán beneficiarse das correspondentes
vantaxes fiscais.