A Aula TIC-PEMES pon en marcha unha revista dixital para achegar as tecnoloxías ás nosas empresas

luns, 27 de xullo do 2015 Redacción

A Aula TIC-PEMES da Universidade de Santiago, emprazada no Campus de Lugo, vén de presentar unha publicación dixital destinada a afondar nun dos principais obxectivos do departamento: achegar as novas tecnoloxías da información á contorna galega, neste caso concreto facendo especial fincapé no noso tecido empresarial. Deste compromiso xorde a publicación electrónica SiPYMEs, unha revista en liña de carácter divulgativo e periódico que, segundo informan os responsábeis da Aula, “recolle e difunde artigos de actualidade vinculados cos beneficios que as TIC ofrecen ás pequenas e medianas empresas (PEME)”.
SiPYMEs xorde pois coa finalidade “de facilitar a adaptación das empresas de menor tamaño á Sociedade da Información, eliminando as diferenzas que puidesen existir entre este e outro tipo de empresas en relación coa utilización das novas tecnoloxías”. Así pois, a contorna de traballo da revista, os seus destinatarios principias, serán os responsábeis das pequenas e medianas empresas do eido lugués e galego, aos que se pretende involucrar de cheo no ámbito das novas ferramentas e a Sociedade do Coñecemento. Na revista haberá un oco para a difusión de reflexións ou experiencias reais arredor das TIC, relatadas polos propios/as empresarios/as, emprendedores/as e expertos/as na aplicación das tecnoloxías desde unha perspectiva empresarial.
“O formato electrónico”, sinalan dende a Aula, “outorga a SiPYMEs a posibilidade de acceso desde calquera punto da xeografía mundial, a súa actualización permanente e a interacción do público coa revista”. A idea complementaria, engaden, é crear unha comunidade de persoas relacionadas ou interesadas co ámbito das TIC e a súa aplicación nas empresas que poidan actuar entre si de diversos modos ao longo do tempo.

PUBLICIDADE