A Autoridade Portuaria de Melilla potencia o seu xestor documental da man de Altia

A Autoridade Portuaria de Melilla confiou na empresa galega Altia para levar cabo un proxecto avanzado de optimización e mellora do xestor documental para dotar este sistema dun maior rendemento, corrección de erros e novas características e funcionalidades. A iniciativa, que supón un investimento de máis de 199.000 euros, “permitirá unha gran redución nos tempos de resposta á hora de deseñar ou modificar calquera procedemento levado a cabo pola plataforma tecnolóxica”, sinalaron fontes de Altia.
A empresa engadiu que a Autoridade Portuaria de Melilla realiza acotío distintos tipos de operacións, como embarque, desembarque e transferencia de cargo, ou almacenamento e depósito de mercadorías en terra e estiba, entre outros labores, “que supoñen a creación e proceso de miles de documentos cada ano”. Coa finalidade de optimizar a súa xestión, a finais de 2021 a entidade decidiu licitar un proxecto para facer evolucionar o funcionamento do seu xestor documental, responsábel da captura, almacenamento e recuperación de documentos. Tras avaliar as distintas propostas recibidas, o organismo confiou na tecnolóxica Altia, con sede en Oleiros (A Coruña), o proxecto para dotar ao sistema dunha mellora relevante na axilidade, rendemento, eficiencia e optimización dos diálogos de usuario, así como mellores tempos e sinerxías para o mantemento evolutivo do xestor de expedientes.
O xestor baséase na tecnoloxía Alfresco, incluíndo unha migración completa do mesmo, xa que o sistema actual funciona coa versión 3.2 e o obxectivo é pasalo á que funcione consolidada no momento da implantación.
Dentro do proxecto Altia salienta o cambio do motor de fluxos, “que vai permitir a diminución de boa parte do código existente na actualidade”. Ademais, as prestacións do novo motor permiten “que todo o fluxo dos procedementos sexa xestionado mediante utilidades do propio motor, evitando así todo o código fonte ata o de agora utilizado para dar cobertura a esas prestacións”. Esta mellora, explica a empresa, “pode supor un antes e un despois no xestor documental, xa que grazas á implantación do novo motor de fluxos vanse reducir de xeito considerábel os tempos de resposta á hora de deseñar e/ou modificar calquera procedemento na plataforma”.