A Biblioteca Nacional preserva os contidos de milleiros de páxinas web en galego

A Biblioteca Nacional de España (BNE) completou con éxito a oitava recolección masiva do dominio .gal, na que conseguiu recoller máis de 7.000 dominios. O proceso, que tivo unha duración de tan só dous días, saldouse co almacenamento de máis de 1,8 TB de información dixital para a súa conservación a longo prazo.
Este traballo foi posible grazas á cooperación coa Biblioteca de Galicia e PuntoGal, entidade encargada da xestión e promoción dos dominios .gal, que facilitou os dominios necesarios para completar esta importante tarefa. A preservación destes contidos web permitirá garantir o acceso futuro aos recursos dixitais que reflicten a identidade cultural galega.
A BNE, como parte da súa misión de conservar a memoria dixital da sociedade, utilizou a súa infraestrutura tecnolóxica para levar a cabo a recolección de maneira eficiente e sen restricións de tamaño por dominio.
Con este traballo, a BNE, a Biblioteca de Galicia e a Asociación PuntoGal dan un paso máis na salvagarda da historia dixital de Galicia, garantindo que a riqueza da lingua e da cultura galega siga sendo accesible para os investigadores, estudantes e cidadáns do futuro.

Eleccións galegas nas coleccións do Arquivo da Web Española

A Biblioteca de Galicia desempeñou un papel fundamental na cobertura das eleccións galegas celebradas o 18 de febreiro de 2024, seleccionando sitios web relativos a enquisas, sondaxes, estudos electorais e información electoral. Ademais, mantén unha colección propia con máis de 1.000 sitios web, achegando o seu coñecemento e experiencia na preservación do patrimonio galego.
Este labor forma parte do compromiso da Biblioteca Nacional de España e da Biblioteca de Galicia coa preservación do patrimonio dixital e a súa misión de garantir o acceso á memoria colectiva da sociedade.
Estes contidos pódense consultar a través da Busca do Arquivo da Web Española | Biblioteca Nacional de España. Ao ter dereitos de autor vixentes, só se poderán consultar desde os ordenadores da BNE e da rede de centros de conservación distribuídos por toda España.