A Biblioteca de Noia acolle este venres un obradoiro de robótica educativa para a rapazada

mércores, 11 de outubro do 2023 S. P.

A Biblioteca Municipal de Noia vai acoller este venres 13 unha actividade maker para a rapazada: unha iniciativa participativa de desenvolvemento tecnolóxico onde todas as persoas participantes terán oportunidade de exercitar o seu talento argalleiro. Trátase dunha xornada de robótica educativa (A Nube de Artear) para nenas e nenos de máis de 6 anos. Celebrarase a partir das 18.00 horas.
Segundo informa a organización (a Xunta a través do programa Ler Conta Moito en colaboración co Concello de Noia e a Biblioteca), neste obradoiro as e os asistentes descubrirán os principios da Ciencia, a Tecnoloxía, a Enxeñaría e as Matemáticas (STEM), “participando nunha experiencia de aprendizaxe divertida e práctica”.
A actividade, engaden, está deseñada para “incentivar a creatividade e a curiosidade, proporcionando oportunidades para construír e probar prototipos de obxectos, animais e vehículos cun enfoque do mundo real”.
As prazas son limitadas e, segundo informou o Concello, xa están esgotadas. Máis información no teléfono 699 30 14 81. A duración estimada da actividade é de 120 minutos.

PUBLICIDADE