A CNMC sanciona con 25,78 millóns de euros a Telefónica Móviles

A Comisión Nacional do Mercado da Competencia (CNMC) decidiu sancionar con 25,78 millóns de euros a Telefónica Móviles por determinados compromisos de permanencia incluídos nos seus contratos para PEME, concretamente nos Contratos Premium especial PYME. Estes compromisos de permanencia, vixentes dende 2006, estaban vinculados a descontos sobre as tarifas e tiñan unha duración inicial de 12, 18 ou 24 meses. A permanencia prorrogábase automaticamente e as penalizacións eran crecentes; é dicir, pagábase unha penalización maior canto máis preto estaba de finalizar o período de permanencia. Así mesmo, para deixar sen efecto a permanencia era necesario un preaviso dun mes. A CNMC resolveu que esta práctica continuada no tempo supón unha infracción da Lei de Defensa da Competencia e do Tratado de Funcionamento da Unión Europea (TFUE).
Os compromisos de permanencia sancionados teñen "efectos restritivos á competencia" posto que limitan "desproporcionadamente" a capacidade dos clientes de Telefónica para cambiar de operador e, por outra parte, incrementa "substancialmente os custos nos que teñen que incorrer os competidores para gañar clientes a custa de Telefónica Móviles", segundo se indica na resolución. O resto de operadores "deixa de estar en igualdade de condicións para competir por estes clientes", polo que "se estaría a excluír outros operadores como os Operadores Móbiles Virtuais (OMVs) do segmento empresarial no mercado minorista de servizos móbiles".
As condicións de permanencia sancionadas afectaban a clientes de Telefónica Móviles que, no seu conxunto, representaron máis do 70% dos ingresos da entidade no ano 2012 no segmento PEME. Neste sector, Telefónica Móviles mantén unha cota de mercado maior e máis estable respecto ao sector residencial que o resto dos seus competidores. A súa cota de mercado aumenta en función do tamaño da empresa.
Para fixar a sanción, a CNMC atendeu á dimensión do mercado afectado, a cota de mercado da empresa responsable, o alcance e a duración da infracción, os efectos sobre os consumidores e outros operadores e os beneficios ilícitos obtidos.