A CRTVG aposta pola información mediante vídeos curtos verticais en G24play

Coincidindo co Día das Letras Galegas, a CRTVG presenta G24play, unha nova canle informativa adaptada ao consumo dixital a través de teléfonos móbiles. O servizo, baseado en vídeos curtos e directos, busca facilitar o acceso á actualidade en galego mediante un formato áxil, visual e doado de compartir.
A principal novidade de G24play é que se trata dunha plataforma propia, tanto en web como en aplicación, o que permite á CRTVG operar con autonomía respecto das regras e algoritmos de compañías estranxeiras como X, Instagram ou TikTok. Así, a corporación gaña marxe de manobra para ofrecer contido informativo en galego sen depender de terceiros.
O contido da nova plataforma parte das noticias do portal G24, adaptadas ao formato vertical, cunha duración breve e con subtítulos incorporados para facilitar o consumo sen son. Actualmente podemos gozar de G24play vía web, e máis adiante poderemos consumir os seus contidos a través de aplicacións móbiles de seu.