A Cámara de Santiago achega en febreiro un curso sobre blockchain para o sector cultural

A Cámara de Comercio Santiago organiza en febreiro un programa formativo de transformación tecnolóxica centrado nas posibilidades de seguridade que pon en xogo a cadea de bloques. O curso Blockchain e NFTs no sector cultural desenvolverase do luns 2 de febreiro de 2026 ao xoves 19 de febreiro de 2026, en horario de tarde: de 16.00 a 18.30 horas. O programa vai dirixido a traballadores, coordinadores, técnicos, artistas ou emprendedores do sector das industrias culturais como sector específico da economía social.
Os obxectivos son facilitar a comprensión do impacto da tecnoloxía blockchain e os NFTs na industria cultural e artística.
Será impartido por Avelino Domínguez González, especialista en análise de datos e aprendizaxe telemática, mestrado en Técnicas Estadísticas e en Biotecnoloxía Avanzada e licenciado en Bioloxía pola Universidade de Vigo, título CAP. Conta no seu haber con máis de 2.500 horas de formación a distancia.. Experto docente en desenvolvemento de aplicacións web e en seguridade informática.
A tecnoloxía de cadea de bloques (blockchain) consiste no fornecemento de libros de contabilidade electrónicos para seren compartidos abertamente por moreas de usuarios e que gravan todas as transaccións que se apuntan neles e sen que haxa xeito de modificalas. En base a isto, o blockchain salienta pola seguridade e pola dispoñibilidade da información.