A Cámara de Santiago móstranos como afinar a nosa puntería nas campañas de ecommerce

mércores, 25 de xaneiro do 2023 S. P.

A Cámara de Comercio de Santiago organiza nesta recta final de xaneiro unha nova actividade formativa de transformación tecnolóxica ao servizo das pequenas e medianas empresas e das persoas autónomas da súa área de influencia. Trátase do obradoiro Campañas publicitarias para un ecommerce. Será o vindeiro 31 de xaneiro en horario de mañá, de 10.00 a 11.15 horas.
No seu transcurso presentarase a liña de actividade da Oficina Acelera PEME, habilitada pola Cámara en colaboración con Red.es, cuxo obxectivo é achegar recursos formativos para impulsar a plena presenza das empresas no ámbito dixital.
Os contidos da xornada do 31 serán os que citamos a continuación: como crear a ficha dun produto, as claves que hai que ter en conta para facer visíbel na Rede un produto ou servizo, como mellorar a conversión de vendas ou como o optimizar o que se coñece como funil (embudo) de conversión.
O relator será Fernando Rodríguez de la Torre, director da axencia de publicidade con C de Comunicación, profesor no Mestrado de Marketing Dixital da USC e director de BriefingGalego.com, portal de referencia do sector da mercadotecnia e a publicidade en Galicia.
Esta xornada está organizada pola Oficina Acelera PEME da Cámara de Comercio de Santiago de Compostela que se inclúe no Programa Operativo Plurirrexional de España FEDER 2014-2020 (POPE), co-financiado polo Fondo Europeo de Desenvolvemento Rexional (FEDER) e por Red.es.

PUBLICIDADE