A Cámara de Santiago oferta xornadas para a transformación dixital

Ao longo dos meses de abril, maio e xuño a Cámara de Comercio de Compostela acollerá varias accións formativas encamiñadas a autónomos, pemes e emprendedores cuxo obxectivo é mellorar as súas competencias dixitais e achegar información puntual sobre as axudas públicas para a innovación na empresa.
A Cámara de Comercio de Santiago de Compostela, a través do seu Coworking Dixital, forma parte da rede de espazos de traballo da Deputación Provincial da Coruña, xunto con outros 10 espazos máis da provincia que, inseridos nesta rede, buscan apoiar ao emprendemento ofrecendo instalacións e espazos axeitados ás necesidades dos emprendedores, apoio aos seus proxectos cun acompañamento e asesoramento especializado e ofrecendo a oportunidade de acceso a traballar de maneira colaborativa con outras persoas que persigan os mesmos obxectivos.
A Cámara de Comercio de Santiago puxo en marcha no ano 2023 o Coworking Dixital CCompostela coa finalidade de fomentar proxectos dixitais de emprendedores e startups e impulsar a transformación dixital de pemes e micropemes da demarcación da Cámara de Comercio de Santiago, neste ano, do mesmo xeito que no anterior, conta ademais coa colaboración do Concello de Santiago, que se une ao apoio aos proxectos empresariais e aos emprendedores que se xestionarán desde o coworking da Cámara compostelá. Desde a súa posta en funcionamento, no Coworking máis de 400 empresas e emprendedores participaron nas súas accións formativas, amais recibíronse máis de 80 solicitudes de servizos de asesoramento e consultoría a empresas e emprendedores.
O 29 de abril desenvolverase online a xornada formativa Oportunidades de Financiamento para Medrar: Innovación en Movemento, na que se ofrecerá información sobre as diferentes opcións de axudas e financiamento público dispoñíbeis para empresas, autónomos e emprendedores.
No mes de maio co curso Claves para deseñar un plan de comunicación en redes sociais, os asistentes poderán coñecer, nunha tarde, os coñecementos prácticos básicos para aplicar diversas técnicas de mercadotecnia dixital nas principais redes sociais.
Para rematar, a formación Ferramentas de IA para a mercadotecnia dixital, búscase achegar aos asistentes coñecementos básicos e prácticos para comezar a usar ferramentas de IA aplicadas á mercadotecnia dixital, esta formación celebrarase no mes de xuño.
Todas as formacións son de carácter gratuíto para os e as asistentes, previa inscrición na páxina web da Cámara de Compostela.