A Cátedra Telefónica da Universidade de Vigo inaugura unha nova edición de HackForGood

A directora en Galicia e Asturias de Telefónica, Paula Beirán; o director da Cátedra Telefónica da Universidade de Vigo, José Cidrás, e o reitor da Universidade de Vigo, Manuel Reigosa, asistiron este venres 21 de outubro á apertura dunha nova edición de HackForGood. Fixérono no Teatro Cidade Universitaria da Universidade de Vigo. Segundo dixeron, esta 8ª edición do hackathon, organizado pola Rede de Cátedras Telefónica, reunirá entre o 20 e o 22 de outubro a máis de 1.000 mozos de varias universidades de España para enfrontarse a un centenar de retos tecnolóxicos con fins sociais.
Entre outros, os proxectos que abordarán os participantes desta edición están relacionados co coidado das persoas maiores, coa xestión dos sobrantes alimentarios en restaurantes, coa aplicación das redes sociais á educación ou coa administración de historiais clínicos.
Esta iniciativa, enmarcada no Ano Europeo da Mocidade, pretende contribuír a poñer o foco sobre a importancia da mocidade europea para “construír un futuro mellor, máis verde, máis inclusivo e dixital, co obxectivo de non deixar a ninguén atrás”, sinalaron na presentación, engadindo que para participar no hackathon, que este ano recupera o seu presencialidade, é necesario ser maior de idade e pertencer a algunha das universidades participantes ou ben ser estudante de Campus 42.
Pódese ter parte activa na iniciativa de tres formas diferentes: como hacker, programador nun grupo de 2 a 6 persoas; como retador, enviando un reto ou expondo un problema social; como divulgador, dando a coñecer HackForGood.
O xurado valorará a formación de equipos multidisciplinares que inclúan todo tipo de perfís: deseñadores, informáticos, enxeñeiros, técnicos, sociólogos, emprendedores sociais, etc., do mesmo xeito que a creatividade e innovación das solucións propostas, o grao de acabado conseguido durante o hackathon e o seu impacto social.
A dotación dos premios ascende a 50.000€, entre premios locais, para os gañadores de cada sede, e os tres nacionais. Na Universidade de Vigo convócanse tres premios HackForGood locais e catro premios temáticos que en conxunto suman 4.000 euros e que recoñecerán as mellores iniciativas en Innovación Enerxética e Sustentabilidade, Innovación Social e a súa adecuación aos Obxectivos de Desenvolvemento Sustentábel da axenda 2030.
Ademais, a iniciativa conta, como en anos anteriores, coa posibilidade de participar nos premios Hack4Good Big Day, que se celebrarán o próximo ano na sede de Telefónica.